星洲炒米

大家還有印象 , 袁太曾經上傳過芙蓉蛋的食譜嗎 ??? 芙蓉蛋餡料袁生還對它念念不忘 , 話想再encore , 話想再食叉燒 , 火腿 , 銀芽 , 蝦仁喎 , 不過袁太唔太想食煎蛋 , 所以唔整芙蓉蛋喇 , 不過呢類型的配料都可以用來做其他餸菜 , 小炒或炒粉麵 ......



呢幾個星期袁生又要趕住交圖 , 見佢都好似快要發瘋 , 咁袁太就用袁生話想再encore既叉燒 , 火腿 , 銀芽 , 蝦仁整佢最喜歡的炒粉麵支持下佢 , 等佢放鬆下心情 , 唔好迫得自己太大壓力 , 呢樣最愛的炒粉麵就係~星洲炒米~ , 星洲炒米絕對係佢頭幾位最愛的食物 



不過袁生對星洲炒米絕對有多多的要求


(一) 唔可以炒得咁乾 , 要有少許汁
(二) 一定要有銀芽同青椒(仲要係多多銀芽個隻)
(三) 唔好整咁辣 , 但又唔可以冇味道
(四) 要多多配料 , 唔可以似茶餐廳咁得個DD配料


其實大大話話袁生食過好多茶餐廳的星米 , 冇一間睇得上眼 , 唔係話太乾就話冇味道冇配料 ,袁太一係唔整 , 一整就會接收晒所有要求 , 誓要整一碟袁生只會讚不會彈的星洲炒米呢 ^^

材料 : 叉燒 , 急凍蝦仁 , 銀芽 , 紅椒 , 青椒 , 火腿 , 韭黃 , 洋蔥 , 天鵝牌米粉 , 咖哩粉 , 黃薑粉 , 鹽 , 糖 , 雞蛋 , 胡椒粉 , 美的早餐機(MZ-DSY18A)

急凍蝦仁用生粉沖洗兩次 , 用水沖一沖洗及瀝乾水份 , 放入碗內加少許胡椒粉及麻油拌勻靜待30分鐘 , 韭黃切段 , 洋蔥去衣切條 , 青椒 , 紅椒去籽切條 , 叉燒切條 , 火腿切片 , 韭黃段用水沖一沖洗及瀝乾 , 雞蛋打成蛋液備用

乾米粉放入鑊中加水 , 用中火煮至米粉鬆散 , 先盛起 , 落油燒紅鑊 , 將咖哩粉及黃薑粉入鑊中爆香 , 加入米粉拌勻炒至上色 , 盛起備用 , 銀芽放入美的早餐機的煲仔內 , 加少許鹽及水 , 蓋上蓋按<蒸 / 煮>功能 , 時間調至10分鐘煮至軟身 , 盛起銀芽用水沖一沖洗及瀝乾 , 蛋液放入早餐機的煎pan內 , 按<煎蛋 / 煙肉>功能 , 慢慢煎至兩面金黃色蛋皮 , 盛起待涼切成蛋絲

燒紅鑊 , 先爆香洋蔥 , 青椒 , 紅椒至微軟 , 加入火腿片及叉燒拌勻炒數分鐘 , 再加入銀芽 , 韭黃及蝦仁拌勻炒至蝦仁轉色 , 加入米粉及調味料拌勻用中火炒至汁料開始收乾 , 最後將蛋絲回鑊拌一拌炒即可

材料 
叉燒1/2條 , 急凍蝦仁1/2磅 , 銀芽 , 紅椒1個 , 青椒1個 , 火腿2片 , 韭黃$3 , 洋蔥1個 , 天鵝牌米粉2個 , 咖哩粉2茶匙 , 黃薑粉1 1/2茶匙 , 鹽 , 糖 , 雞蛋2隻 , 胡椒粉 , 美的早餐機(MZ-DSY18A)

調味料
蠔油 , 生抽 , 糖 , 水



做法
1. 急凍蝦仁用生粉沖洗兩次 , 用水沖一沖洗及瀝乾水份 

2. 放入碗內加少許胡椒粉及麻油拌勻靜待30分鐘 

3. 韭黃切段 , 洋蔥去衣切條 , 青椒 , 紅椒去籽切條 , 叉燒切條 , 火腿切片 

4. 韭黃段用水沖一沖洗及瀝乾

5. 雞蛋打成蛋液備用

6. 乾米粉放入鑊中加水 , 用中火煮至米粉鬆散 , 先盛起 

7. 落油燒紅鑊 , 將咖哩粉及黃薑粉入鑊中爆香 , 加入米粉拌勻炒至上色 , 盛起備用

8. 銀芽放入美的早餐機的煲仔內 , 加少許鹽及水 

9. 蓋上蓋按<蒸 / 煮>功能 , 時間調至10分鐘煮至軟身

10. 盛起銀芽用水沖一沖洗及瀝乾 

11. 蛋液放入早餐機的煎pan內 , 按<煎蛋 / 煙肉>功能 , 慢慢煎至兩面金黃色蛋皮 

12. 盛起待涼切成蛋絲

13. 燒紅鑊 , 先爆香洋蔥 , 青椒 , 紅椒至微軟 

14. 加入火腿片及叉燒拌勻炒數分鐘 

15. 再加入銀芽 , 韭黃及蝦仁拌勻炒至蝦仁轉色 

16. 加入米粉及調味料拌勻用中火炒至汁料開始收乾 , 最後將蛋絲回鑊拌一拌炒即可 




袁太的星洲炒米獲得袁生的高度讚賞 , 仲話味道好味過餐廳喎 , 開心死我呢 ^^