奶皇西米糕

西米糕大家喜愛嗎 ??? 袁生袁太好喜歡架 , 坊間賣的西米糕一般都是豆沙餡 , 蓮蓉餡 , 甚至紫薯餡都有 , 不過袁生還是最愛奶皇餡 , 淡口的西米味道 , 再配上奶皇的香甜味 , 相當夾 , 西米糕的製作無論面層的西米糊 , 還是內裡的奶皇餡都唔太複雜 ......

之不過整奶皇餡又要煮杰身 , 又要待涼 , 又要雪 , 又要整西米湖 , 又要蒸 , 都要用上幾粒鐘時間 , 製作西米糕最重要的步驟 , 蒸完後一定要完全待涼才可脫模 , 咁西米糕就會靚靚仔仔 , 不過今次的賣相就麻麻地喇 , 皆因袁生不停問食得未 , 攪到未完全放涼就脫模 , 趕住影相後俾袁生試味 , 好彩賣相還算可以 , 西米糕皮薄 , 餡料多多 , 幼皇餡多到就快瀉晒出黎 , 味道超正

今次就保守少少 , 只整了八個西米糕 , 袁生話唔係好夠食 , 所以下次要加重份量 , 整多多西米糕俾袁生食先得 , 不過下次想試整紅豆餡 , 甜點袁太永遠都係鐘意紅豆餡多d呢 ^^

材料 : 西米 , 鮮奶 , 馬蹄粉 , 淡奶 , 吉士粉 , 油 , 雞蛋 , 牛油 , 糖 , 麵粉 , 蛋撻模 , 水 , 掃

雞蛋打入大碗內 , 加入吉士粉 , 麵粉 , 100ml鮮奶拌勻至冇粉粒 , 煲內放入45g砂糖 , 牛油 , 花奶及餘下的150ml鮮奶拌勻 , 用中火煮至牛油溶化 , 加入之前的雞蛋吉士糊 , 用慢火一路拌勻一路慢慢煮至杰身 , 盛起待涼20分鐘再放入冰箱冷藏1小時

西米放入煲內 , 加水蓋過面拌一拌勻 , 用中火煮滾後再拌一拌勻西米以免黏底 , 熄火蓋上蓋焗20分鐘 

馬蹄粉 , 30g砂糖 , 水及少許油拌勻至冇粉粒 , 已焗20分鐘的西米隔水倒在隔篩內 , 用水沖洗雜質 , 瀝乾水份加冰水浸過面靜待10分鐘 , 10分鐘後再瀝乾水份備用

將瀝乾的西米放入大碗內 , 加入馬蹄水拌勻 , 蛋撻模掃上油 , 先放西米糊至一半滿 , 再放入奶皇餡 , 再放入西米糊至全滿 , 隔水用中火蓋上蓋蒸10分鐘 , 蒸好待20分鐘至涼

繼續將蛋撻模掃上油 , 逐一將餘下的西米糊放入蛋撻模至一半滿 , 放入奶皇餡 , 再放入西米糊至全滿 , 隔水用中火蓋上蓋蒸10分鐘 , 蒸好待涼20分鐘 , 直至西米湖用完 , 最後用竹簽將西米糕起出即可

材料

西米100g , 鮮奶1支 , 馬蹄粉70g , 淡奶50ml , 吉士粉2湯匙 , 油 , 雞蛋1隻 , 牛油 , 糖45g+30g , 麵粉2湯匙 , 蛋撻模 , 水70ml , 掃

做法

1. 雞蛋打入大碗內 , 加入吉士粉 , 麵粉 , 100ml鮮奶拌勻至冇粉粒 

2. 煲內放入45g砂糖 , 牛油 , 花奶及餘下的150ml鮮奶拌勻 

3. 用中火煮至牛油溶化 , 加入之前的雞蛋吉士糊 , 用慢火一路拌勻一路慢慢煮至杰身 

4. 盛起待涼20分鐘再放入冰箱冷藏1小時

5. 西米放入煲內 , 加水蓋過面拌一拌勻

6. 用中火煮滾後再拌一拌勻西米以免黏底 , 熄火蓋上蓋焗20分鐘 

7. 馬蹄粉 , 30g砂糖 , 水及少許油拌勻至冇粉粒 

8. 已焗20分鐘的西米隔水倒在隔篩內 , 用水沖洗雜質 , 瀝乾水份加冰水浸過面靜待10分鐘

9. 10分鐘後再瀝乾水份備用

10. 將瀝乾的西米放入大碗內 , 加入馬蹄水拌勻 

11. 蛋撻模掃上油 , 先放西米糊至一半滿 , 再放入奶皇餡 

12. 再放入西米糊至全滿

13. 隔水用中火蓋上蓋蒸10分鐘 , 蒸好待20分鐘至涼

14. 繼續將蛋撻模掃上油 , 逐一將餘下的西米糊放入蛋撻模至一半滿 

15. 放入奶皇餡 , 再放入西米糊至全滿 

16. 隔水用中火蓋上蓋蒸10分鐘 , 蒸好待涼20分鐘 , 直至西米湖用完 

17. 最後用竹簽將西米糕起出即可




奶皇餡甜度適中 , 外層的西米又煙煙勒勒 , 靚靚仔仔的奶皇西米糕 , 有冇朋友仔想試下呢 ^^